കുവൈറ്റ് സിറ്റി: ഗൾഫ് സന്ദർശനത്തിന്റെ ഭാഗമായി കുവൈത്തിലെത്തിയ മുഖ്യമന്ത്രി പിണറായി വിജയന് അവിസ്മരണീയമായ വരവേൽപ്പൊരുക്കി പ്രവാസി മലയാളികൾ. മൻസൂരിയ അൽ അറബി ഇൻഡോർ

സ്റ്റേഡിയത്തിൽ നടന്ന പ്രവാസി സംഗമം മുഖ്യമന്ത്രി

ഉദ്ഘാടനം ചെയ്തു.

കേരളത്തെ വികാരമായി കൊണ്ടുനടക്കുന്നവരാണ് ലോകത്താകെയുള്ള പ്രവാസി മലയാളികളെന്ന് മുഖ്യമന്ത്രി പറഞ്ഞു. കേരളത്തെക്കുറിച്ചുള്ള പ്രവാസികളുടെ കരുതലിന്റെയും പ്രതീക്ഷയുടെയും ഭാഗമായാണ് ഗൾഫ് പര്യടനത്തിന്റെ ഭാഗമായി ലഭിച്ച ഉജ്വല സ്വീകരണങ്ങൾ. പോയ ഇടങ്ങളിലെല്ലാം ഒന്നിനൊന്ന് മെച്ചപ്പെട്ട മലയാളി കൂട്ടായ്മകളാണ് കണ്ടത്. കുവൈത്തും ആ പട്ടികയിൽ മുൻപന്തിയിൽ നിൽക്കുന്നുവെന്നും അദ്ദേഹം വ്യക്തമാക്കി. കഴിഞ്ഞ ഒൻപത് വർഷക്കാലത്തെ കേരളത്തിലെ വികസനപ്രവർത്തനങ്ങൾ മുഖ്യമന്ത്രി തന്റെ പ്രസംഗത്തിൽ എണ്ണിയെണ്ണി പറഞ്ഞു. അതോടൊപ്പം പ്രതിപക്ഷത്തിന്റെ വികസന വിരുദ്ധ നിലപാടുകളും കേന്ദ്ര സർക്കാരിന്റെ വികസന പദ്ധതികൾക്കെതിരെയുള്ള സാമ്പത്തീക ഉപരോധവും അദ്ദേഹത്തിന്റെ പ്രസംഗത്തിൽ പരാമർശിച്ചു.

കേരളത്തിന്റെ 75ആം വാർഷികത്തോടാനുബന്ധിച്ചു കേരളത്തിൽ നടത്തുന്ന വികസന പ്രവർത്തനങ്ങൾക്ക് ജി സി സിയുടെ സഹകരണം ആവശ്യപ്പെടുക എന്നത് കൂടിയാണ് ഈ യാത്രയുടെ ലക്ഷ്യമെന്ന് തുടർന്ന് സംസാരിച്ച സാംസ്‌കാരിക വകുപ്പ് മന്ത്രി സജി ചെറിയാൻ വ്യക്തമാക്കി. അധികാരികളുമായുള്ള കൂടിക്കാഴ്ച്ചയിൽ ഇതിന് വലിയ പിന്തുണയും പ്രതീക്ഷയുമാണ് ലഭിച്ചത്. പ്രവാസികൾക്കായുള്ള ജനപ്രിയ പദ്ധതികളുടെ തയ്യാറെടുപ്പിനും ഈ യാത്ര ഉപകരിക്കുമെന്ന് അദ്ദേഹം കൂട്ടി ചേർത്തു.

വൈകുന്നേരം 5ന് തുടങ്ങിയ മുഖ്യമന്ത്രിക്കുള്ള സ്വീകരണ പരിപാടിയിൽ മലയാളം മിഷൻ കുവൈത്ത്‌ ചാപ്റ്റർ സെക്രട്ടറിയും സംഘാടക സമിതി ജനറൽ കൺവീനറുമായ ജെ സജി അധ്യക്ഷനായി. മന്ത്രി സജി ചെറിയാൻ, ഇന്ത്യൻ എംബസി ഡെപ്യൂട്ടി ചീഫ് ഓഫ് മിഷൻ സഞ്ജയ് മുലൂക്ക, ചീഫ്‌ സെക്രട്ടറി ഡോ. എ ജയതിലക്, നോർക്ക റൂട്ട്‌സ്‌ വൈസ്ചെയർമാൻ എം എ യൂസഫലി എന്നിവർ സംസാരിച്ചു. ലോക കേരള സഭ അംഗങ്ങളായ ആർ നാഗനാഥൻ, സജി തോമസ് മാത്യു, സി രജീഷ്, ഉണ്ണിമായ ഉണ്ണികൃഷ്ണൻ, സത്താർ കുന്നിൽ, ബാബു ഫ്രാൻസിസ്, സി കെ ന‍ൗഷാദ്, ശ്രീഷ ധയാനന്ദൻ, സംഘാടക സമിതി ചെയർമാൻ ഡോ. അമീർ അഹമ്മദ്, വർക്കിങ്‌ ചെയർമാൻ മാത്യു ജോസഫ്, ബോബൻ ജോർജ്, അൽമുല്ല ജനറൽ മാനേജർ ഫിലിപ്പ്‌ കോശി, മെട്രോ മെഡിക്കൽ കെയർ സിഇഒ മുസ്‌തഫ ഹംസ, ഫീനിക്‌സ്‌ ചെയർമാൻ സുനിൽ പാറക്കപാടത്ത് എന്നിവർ വേദിയിൽ സന്നിഹിതരായി.

മുഖ്യമന്ത്രിക്കുള്ള ഉപഹാരം കല കുവൈറ്റ് പ്രസിഡന്റ്‌ മാത്യു ജോസഫ്, മന്ത്രി സജി ചെറിയാനുള്ള ഉപഹാരം സജി തോമസ് മാത്യു, ഡോ: ജയതിലകിനുള്ള ഉപഹാരം സത്താർ കുന്നിൽ, ഇന്ത്യൻ എംബസി ഡെപ്യൂട്ടി ചീഫ് ഓഫ് മിഷൻ സഞ്ജയ് മുലൂക്കക്കുള്ള ഉപഹാരം ബാബു ഫ്രാൻസിസ്, എം എ യൂസഫലിക്കുള്ള ഉപഹാരം സി കെ നൗഷാദും കൈമാറി. പ്രധാന സ്പോൺസർമാരായ അൽമുല്ല ഗ്രൂപ്പ്, ലുലു ഹൈപ്പർ, മെട്രോ മെഡിക്കൽ കെയർ, ഫിനിക്സ്, ഗ്രാൻഡ് ഹൈപ്പർ, മലബാർ ഗോൾഡ്, കൂടാതെ യുണൈറ്റഡ് സ്കൂൾ മാനേജർ ജോയൽ, മാർക്കറ്റ് നോളജ് പ്രതിനിധി ഷംനാദ് എന്നിവരും വേദി പങ്കിട്ടു.

സംഘാടക സമിതി കോഓർഡിനേറ്ററും കല കുവൈത്ത്‌ ജനറൽ സെക്രട്ടറിയുമായ ടി വി ഹിക്‌മത്ത്‌ സ്വാഗതവും ലോക കേരളസഭ അംഗം മണിക്കുട്ടൻ എടക്കാട്ട് നന്ദിയും പറഞ്ഞു.