തിരുവനന്തപുരം: കുവൈത്തിലെ മലയാളികളുടെ പ്രമുഖ സാംസ്കാരിക സംഘടനയായ കേരള ആർട്ട് ലവേഴ്സ് അസോസിയേഷൻ - കല കുവൈറ്റ് കേരളത്തിൽ രൂപീകരിച്ച കുവൈറ്റ് കലാ ട്രസ്റ്റ് എസ് എസ് എൽ സി വിജയികൾക്ക് നൽകുന്ന വിദ്യാഭ്യാസ എൻഡോവ്മെന്റിന് അപേക്ഷ ക്ഷണിച്ചു. സംസ്ഥാന സിലബസിൽ പഠിച്ച് 2025ൽ എസ്.എസ്.എൽ.സി വിജയിച്ചവരാകണം അപേക്ഷകർ. സാമ്പത്തിക പിന്നോക്കാവസ്ഥയും പരീക്ഷയിലെ മാർക്കും പരിഗണിച്ച് ഒരു ജില്ലയിൽ നിന്നുള്ള രണ്ട് വിദ്യാർത്ഥികൾ വീതം 28 പേർക്ക് 7500 രൂപ വച്ചാണ് എൻഡോവ്മെന്റ്. വിലാസവും ഫോൺ നമ്പറും പഠിച്ച വിദ്യാലയത്തിന്റെ പേര് സഹിതം തയ്യാറാക്കിയ അപേക്ഷയോടൊപ്പം മാർക്ക് ലിസ്റ്റിന്റെ പകർപ്പും വില്ലേജ് ഓഫീസർ നൽകിയ വരുമാന സർട്ടിഫിക്കറ്റും സംസ്ഥാന സിലബസ് പഠിച്ചതെന്ന് തെളിയിക്കുന്ന സ്കൂൾ ഹെഡ്മാസ്റ്ററുടെ സാക്ഷ്യപത്രവും റേഷൻ കാർഡിന്റെ പകർപ്പും ഉൾപ്പെടെ താഴെ കൊടുത്ത ഏതെങ്കിലും വിലാസത്തിലോ, kalaonweb@gmail.com, sudersancherthala@gmail.com ലോ ജൂൺ 30ന് മുമ്പ് ലഭിക്കുന്ന വിധം അയക്കണം.