25 ജനുവരി, 2025. കുവൈറ്റ്‌ സിറ്റി: ബാലവേദി കുവൈറ്റ്, ഇന്ത്യയുടെ 76 ആം റിപ്പബ്ലിക് ദിനാഘോഷങ്ങൾ സംഘടിപ്പിച്ചു. ആഘോഷങ്ങളോടനുബന്ധിച്ച് നടന്ന റിപ്പബ്ലിക് ദിന സമ്മേളനം പുരോഗമന കലാസാഹിത്യ സംഘം സംസ്ഥാന സെക്രട്ടറിയും അധ്യാപകനുമായ എം എ സിദ്ദിഖ് ഉദ്ഘാടനം ചെയ്തു. ഇന്ത്യൻ റിപ്പബ്ലിക്ക്‌ വിഭാവനം ചെയ്യുന്ന വിശാലമായ വീക്ഷണങ്ങളെപ്പറ്റി കുട്ടികളോട് അദ്ദേഹം സംവദിക്കുകയും ചെയ്തു. ബാലവേദി ആക്ടിങ്ങ് പ്രസിഡന്റ് ബ്രയാൻ ബേസിൽ അധ്യക്ഷനായിരുന്നു. ബാലവേദി ജനറൽ സെക്രട്ടറി ആഞ്ജലിറ്റ രമേശ് സ്വാഗതം ആശംസിച്ചു സംസാരിച്ചു. അബൂഹലീഫ മേഖലാ പ്രസിഡന്റ് ആഗ്നസ് ഷൈൻ റിപ്പബ്ലിക് ദിന സന്ദേശം അവതരിപ്പിക്കുകയും ബലവേദി ഫഹാഹീൽ മേഖലാ പ്രസിഡന്റ് സ്നേഹ ജിത്ത് ഇന്ത്യൻ ഭരണഘടനയുടെ ആമുഖം വായിക്കുകയും ചെയ്തു. കല കുവൈറ്റ് പ്രസിഡന്റ് മാത്യു ജോസഫ്, ബാലവേദി കേന്ദ്ര രക്ഷാധികാരി സമിതി കോർഡിനേറ്റർ ശങ്കർ റാം തുടങ്ങിയവർ ആശംസകൾ അറിയിച്ച് സംസാരിച്ചു. റിപ്പബ്ലിക് ദിന ആഘോഷങ്ങളുടെ ഭാഗമായി സംഘടിപ്പിച്ച കളക്ടീവ് ഡ്രോയിങ് കോമ്പറ്റീഷനിൽ അബുഹലീഫ മേഖലയിലെ പുലരി ക്ലബ്ബ് ഒന്നാം സ്ഥാനവും, ഫഹാഹീൽ മേഖലയിലെ വിവിധ ക്ലബ്ബുകളിൽ നിന്നായി പങ്കെടുത്തവർ രണ്ടാം സ്ഥാനവും, അബ്ബാസിയായിലെ അബ്ദുൽ കലാം ക്ലബ്‌ മൂന്നാം സ്ഥാനവും കരസ്ഥമാക്കി. വിജയികൾക്ക് ബാലവേദി കേന്ദ്ര രക്ഷാധികാരി സമിതി അംഗങ്ങളും കല കുവൈറ്റ് ഭാരവാഹികളും ചേർന്ന് സമ്മാനങ്ങൾ വിതരണം ചെയ്തു. വിവിധ മേഖലകളെ പ്രതിനിധീകരിച്ചുകൊണ്ട് 160 ഓളം കുട്ടികളാണ് കളക്ടീവ് ഡ്രോയിങ് കോമ്പറ്റീഷനിൽ പങ്കെടുത്തത്. തുടർന്ന് ബാലവേദി ക്ലബ്ബുകളിൽ നിന്നുള്ള കുട്ടികൾ അവതരിപ്പിച്ച കലാപരിപാടികളും നടന്നു. ബാലവേദി അബ്ബാസിയ മേഖല സെക്രട്ടറി ഗൗരിപ്രിയ ഗിരീഷ് കുമാർ ചടങ്ങിന് നന്ദി പറഞ്ഞു.